Ələsgərli kəndi – Şəmkir rayonun eyniadlı inzibati ərazi vahidində olan kənddir. Kənd Zəyəm çayının sahilində, Kicik Qafqaz silsiləsinin ətəyində yerləşir. Kənddə 1988-ci ildə əsasən Göyçə mahalından köçmüş əhali məskunlaşdıqdan sonra onların təklifi ilə kəndin mövcud olan Badakənd adının dəyişdirilməsi və böyük saz-söz ustadı Aşıq Ələsgərin şərəfinə Ələsgərli adlandırılması təklif olunmuşdur.

1990-cı ildə kəndin adı Aşıq Ələsgərin şərəfinə Ələsgərli adlandırılmışdır. Memorial toponimdir.

Mənbə: “Azərbaycan toponimlərinin ensiklopedik lüğəti”. İki cilddə. I cild. Bakı, “Şərq-Qərb”, 2007. səh.427

Aşıq Ələsgər küçəsi – Bakı şəhərinin Xətai rayonunda küçə. Küçə Azərbaycanın ustad aşığı Aşıq Ələsgərin adını daşıyır. 

Küçə 2015-ci ildə əsaslı təmir olunmuşdur.

Aşıq Ələsgər küçəsi Ukrayna dairəsi ilə kəsişir. İstək İbtidai Beynəlxalq məktəbi, Pluton şadlıq sarayı, Şərq-Qərb nəşriyyatı və başqa mühüm obyektlər bu küçədə yerləşir.

Mənbə: “Azərbaycan” qəzeti, 29 dekabr 2015

Aşıq Ələsgər adına 36 nömrəli tam orta məktəb – Gəncə şəhərində fəaliyyət göstərən orta ümumtəhsil məktəbi. Məktəbdə hal-hazırda 730 şagird təhsil alır. Məktəbin direktoru Məmmədova Sədaqət Firuddin qızıdır.

Məktəb Gəncə şəhərinin Kəpəz rayonunun “Əbül Üla Gəncəvi küçəsi” 42 ünvanında yerləşir.

Aşıq Ələsgər adına mədəniyyət еvi – Bakı şəhərində fəaliyyət göstərir.